Қазақстандықтардың зейнетақы жинақтары қайда салынды?

Бірыңғай жинақтаушы зейнетақы қорының (БЖЗҚ) зейнетақы активтері портфеліндегі негізгі үлесті бұрынғысынша Қазақстан Қаржы министрлігінің мемлекеттік бағалы қағаздары алады. Олардың ағымдағы құны 10 триллион теңгені құрайды, бұл зейнетақы активтерінің жалпы көлемінің 44,48% – на тең, деп хабарлайды BAQ.KZ.

2025 жылғы мамырда зейнетақы активтерін басқаратын Қазақстан Ұлттық Банкі қаражатты түрлі қаржы құралдарына инвестициялауды жалғастырды. Бір ай ішінде қазақстандықтардың жинақтары есебінен сатып алынды:

• ҚР Мемлекеттік бағалы қағаздары – 479 млрд теңге;
• АҚШ мемлекеттік бағалы қағаздары – 219,8 млрд теңгеге;
• “Бәйтерек“ холдингінің облигациялары–65 млрд теңге;
• Отбасы банкінің облигациялары – 24,5 млрд теңге;
• Еуропалық Қайта Құру және даму банкінің (ЕҚДБ) облигациялары – 7,5 млрд теңге.

Сонымен қатар мамыр айында Қор бұрын сатып алынған бірқатар бағалы қағаздар бойынша өтемақы алды:

• ҚР МБҚ – 14,8 млрд теңге сомасына;
• АҚШ МБҚ – 71,6 млрд теңге;
• “Бәйтерек“ облигациялары – 124,3 млрд теңге;
• ЕҚДБ облигациялары–30 млрд теңге.

Жыл басынан бері қордың жиынтық инвестициялық кірісі теріс болып қалуда – минус 146,36 млрд теңге (-0,69% кірістілік). БЖЗҚ-дағы шығындардың негізгі себептері Қазақстанның мемлекеттік бағалы қағаздарының нарықтық құнының төмендеуі және АҚШ долларына қатысты теңгенің нығаюы деп аталды.

Сонымен қатар, сәуір және мамыр айларында қор оң нәтиже көрсетті: екі айда инвестициялық табыс тиісінше 214,94 млрд теңгені және 85,18 млрд теңгені құрады.

Дереккөз: BAQ.KZ